2Cor 6 | GAM | STEP | No God kogoye una mormon pille, no ye mor al kandja embe djinmon, God ye kollkamang ye awi i ge, ye wal kiwa dje kane nakerne.

2 Corinthians 6

Aposel imb kake mor

1 No God kogoye una mormon pille, no ye mor al kandja embe djinmon, God ye kollkamang ye awi i ge, ye wal kiwa dje kane nakerne. 2 Ge God kandja embe dji,

Ege kune pai al na we dje pille kamang yen mal na pill.
Ege ge na ni i woro awo, pak to awill we dji.
Alla, na kandja embe dje ye aundo, ipon yero ge ege wopake yero. God nono i woro aunda ege ipon yero. 3 Una kulnab yage djine dje wanmormon. Embe yembona una no kogo yenmon ge kiyam natane, man. 4 Ye no God kogoye una kaima mormon dje kanne dje yenmon. Ge una no ye ke ye awinj ne, no imb kakmonka, wal ke no boll wondaka urup paraka mormon. 5 Una kunda kake no tonjka, koll tondaka, kaye pa, kogo yembe boll ye, ou naparmon. 6 Ba alla no kumbene kuruwo yendaka, wal pille kane ye, kiye dje ye, una wandill golo awo, God Murble boll wane, una boll kaima kaima kane wopake ye awo singare kende naye, 7 kandja kaima djinmon. God yembe no boll paraka, singare du dje yenmon mal ge no kunda wal aglene wo dar to amblo yenmon ge yero. 8 Una pende no kandjine amblo pla worinjka, pende kane ke kaninjka, pende no kogo wopake yenmon we djinjka, pende no kogo ke mal yenmon we djinj. No singare pai mal yenmon ba, no kende una mormon we djinj. 9 Pende no kanbon dje nayenj ba pende merke no pille kane yenj. No gopin pora dji dje kaninj ba ge man, gun molo pa mormon. No to gopon dje yenj ba alla to nagor. 10 No wandill golo mormon, ba arngan eri ye wanmon, no tom mormon ba alla kogo yenmon al una wal merke kane nonj. No wal kane nanopin ba wal porapora kane nopin mal mormon.

11 No ye kane wopake kaima kanmon we dje pene woro ye Korin una aumon, 12 No ye kane wopake kanbon dje yenmon ba ye no kane wopake kane nawinj. 13 Ye na wombana mal embe mor ge na ye kandja dje aundo, no ye wopake kanmon mal embe ye no para wopake kanne.

Pillgi napai una boll kogo taimane amblo nayembon

14 Pillgi napai una moye ge ye ga boll kogo taimane nayene. Singare ke wopake wo er taimane bell kune nayenda. Emill au wo taimane bell kune nayenda. 15 Krais Satan boll mopell kune yendo mo? Pillgi pai una ne pillgi napai una nomane taimane paro mo? Ge man. 16 God gun moro iwa numbiye ge nono mormon. Ge pille, God numbiye ne god kende mor ge wo er taimane pine kune nayendo. God dji mal,

Na ga boll molo pano, na ga boll wanmoyo.
Na ga Godne moyo alla ga na unakna moye we dji.
17 Embe pille, ye ga mor al kere po djell moye
we dje Iwa Kerman embe dji.
Na nalena al wal ke moya ge ye nabiye,
ye nabi dal, na ye i numog worno.
18 Na ye nane moyaka,
ye na warna abona moye we dje Iwa Kerman yembe dongall pai iwa ge embe dji.